Chauffeur burachi a ocasiona accident net dilanti Take Away

ORANJESTAD (AAN): Diasabra marduga alrededor di 1:30 am, e clientenan para na Ruiz Take Away riba e caminda di Playa pa Tanki Leendert a pasa den un susto,

momento cu un auto sedan Nissan Tiida a baha di caminda y dal contra vehiculo staciona, y despues esey a bay dal contra un auto staciona.

   Segun testigonan, e auto aki esta e Nissan Tiida tabata bayendo direccion nort ora cu el a baha caminda na su man drechi, a dal contra un Honda CR-V color blanco staciona pariba di caminda banda di e Take Away.  E Honda aki na su turno a hala di banda y bay pega contra un sedan Kia Rio color blanco.

   Mesora a yama polis.  E prome patruya cu a yega eynan, a bay papia cu e chauffeur di e Nissan Tiida, kende ta un hoben cu ta lomba sunu.  A cuminza papia cu ne, y agentenan a bin ripara cu e forma di papia y mas, ta caracteristicanan cu un persona bao influencia ta presenta.

   Nan a pidi su cooperacion pa supla riba aparato di Alco Sensor IV y el a bay di acuerdo.  Sinembargo, e test aki a sali basta malo p'e, como cu e µg/l a sobrepasa e limite legal di Aruba.

   El a wordo deteni eynan mes y transporta pa warda.  Polis a tuma detaye di tur esnan eybao cu a keda perhudica door di e accident.