Hopi bringamento y buracheria durante Jouvert Morning

Total di 21 persona a keda deteni

ORANJESTAD (AAN): Riba Diasabra marduga, pa exactamente 3:00 am tabatin comienso di e parada di Jouvert Morning 2024 for di dilanti di Joe Laveist Sportpark na San Nicolas.  Oficialnan di Cuerpo Policial y tambe dirigentenan di SMAC tabatey na e comienso.

   E marduga aki, Cuerpo Policial tabtin un total di 138 personal riba pia. Diferente departamento di Cuerpo Policial a traha hunto entre otro Mobiele Eenheid, Flex Team, Polis Uniforma, Departamento di Recherche, Personal administrativo, departamento di trafico y planologie, AE, K9 Unit, Mobiel Commando y como tambe personal di CEA.

   E mal noticia ta cu atrobe tabatin hende cu aparentemente for di Diabierna anochi caba ta bebiendo, y ora cu nan a cuminsa jump den e parada aki, nan comportacion a cuminsa laga di desea, y asina ta start bringamento y confrontacionnan inecesario.

   Polisnan tabata vigilante, y asina a aresta hende cu tabatin droga den nan poder, a gara hendenan canando cu cuchiu.  A aresta personanan cu a cuminsa bringa, y nan a ser hiba mesora for di e ruta rumbo pa Warda di Polis.

   A detene hendenan tambe cu no a sigui ordo di Polis.  Esaki ta algo cu Ley ta baha pisa riba dje.

   Vocero di Polis a confirma na DIARIO, cu durante e Parada di Jouvert Morning, nan a detene 21 persona.  Di esaki, 6 detenido a wordo pasa pa Departamento di Recherche.  Loke nan a comete ta algo mas grave, e.o. hincamento y bringamento cu maltrato severo, y esey ta rekeri atencion di e oficialnan hudicial aki.

   E biaha aki a detene 2 hende mas compara cu e 19 persona aresta durante Jouvert Morning na 2023.

   Polis a indica cu pa Pa 7:44 am, e cabez di e parada a yega Joe Laveist y pa 8:14 am e parada a yega su final.