Atrobe tabatin hopi bringamento cerca publico mirando Parada di Luz  

Mira cuanto arma blanco a keda confisca

 *Polis a detene 18 persona bringando of burachi

ORANJESTAD (AAN): Diasabra anochi pa exactamente 7:59 pm, oficialnan di Cuerpo Policial conhuntamente cu SMAC para net na e cruzada di Avenida Milio Croes y Awakatistraat, a haci inicio di Lighting Parade.

   E anochi aki tabata tin un total di 9 grupo y 4.201 participante, di cual mayoria ta decora cu luz.

   Pa e Lighting Parade, Cuerpo Policial a conta cu 201 personal. Entre otro Polis Uniforma, Mobiele Eenheid, AE, departamento di recherche,  Motor Unit, K-9, departamento di trafico,, Mobile Commando, departamento di planologie, personal administrativo  y como  tambe personal di CEA.

   Pa 12:57 am, e cabez a yega ex-DOW y pa 3:15 am, e parada a yega final.

   Comportacion di algun hende a lo largo di e ruta un biaha mas ta demostra cu tin cierto individuo kendenan no por controla nan mes ora cu nan bira burachi.  Nan mecha ta cortico, y pa cualkier cos kens ya nan kier bringa, pleita, of keda haci fastioso.

    Vocero Liliana Rasmijn di Cuerpo Policial a splica cu e aña aki, Polis a lo largo di e ruta a detene un total di 18 persona.

   Detencion pa bringamento, buracheria publico, pero tambe pa esnan cu a wordo haya cu droga den nan poder, y tambe arma blanco!  Mira e potret y ta imposible pa pensa cu hende ta bay Parada di Luz cu machete den nan poder.

    Tambe a detene hende cu no kier a sigui ordo di Polis.  Siendo cu nan como representante di ley, ora cu nan dunabo ordo, bo tin di cumpli cune mesora.

   Awor den Carnaval 70 tabatin mas detencion den Lighting Parade compara cu e 12 persona deteni aña pasa na 2023.