Riba caminda di San Nicolas pa Playa a detene total di 14 persona tras di stuur

Despues di Jouvert Morning

ORANJESTAD (AAN): For di Diasabra marduga te cu mainta, Polisnan a bay percura cu trafico ta safe, door di check movimento di automobilistanan riba caya, principalmente esnan cu ta bahando di San Nicolas rumbo pa pabao di brug.

   A ser splica cu durante y despues di Jouvert Morning unidad motorisa a tene nan control di trafico na diferente puntonan strategico rond e isla.

   E mainta aki so, nan a controla mas cu 200 vehiculo di motor y a detene 14 chauffeur pa maneha bao di influencia di alcohol.

   Durante e control aki, a resulta cu e nivel di alcohol den nan curpa ta asina halto, te cu e Aparato di Alco Sensor IV no por a midi mas e cantidad di µg/l cu tin den nan sistema.  Esey nifica cu legalmente nan ta pata-pata, y e 12 chauffeurnan aki a perde nan rijbewijs “ingevorderd”.

   Esaki nifica, cu obligatoriamente nan tin di bay presenta dilanti Huez pa trata nan caso.  Tambe tabatin 2 persona sinta tras di stuur, cu no tabata tin rijbewijs mes. Pesey cada uno a wordo aresta, cu boei na man, y e violacion di Articulo 10 di Ley di Trafico, nifica cu nan lo tin di bay paga un boet di 550 Florin, segun e ultimo detaye di website di Ministerio Publico di Aruba ta indica.

    E biaha aki tabatin 14, cu ta menos cu na aña 2023 tempo cu tabata tin 24 detencion.

   Cuerpo Policial Aruba ta keda recorda un biaha mas, si bo ta bebe of ta bou influencia NO stuur. Busca bo amigo responsabel pa stuur pabo.  Controlnan di unidad motorisa lo continua durante y despues di cada evenemento di Carnaval.