Homber no kier a acepta cu relacion a caba y ex pareha a bira victima di maltrato grave

Incidente serio na Esmeralda

ORANJESTAD (AAN): Diadomingo anochi, polis a ricibi un yamada urgente pa yega na Esmeralda, caminda un homber tabata maltratando un hende muhe.

Ora polisnan a yega riba sitio, e individuo, visiblemente rabia, a sali pafo y a move den direccion di e agentenan manera cu e kier a ataca nan.
E situacion a obliga e polisnan pa actua rapido y pone man riba su persona pa deten’e.

E senora, cu a keda victima di maltrato grave, tabatin mester asistencia medico inmediato. Motibo di esaki tabata pasobra e agresor no kier a acepta cu e relacion a caba.

Miembro di CEA a yega lihe na e sitio, y a transporta e homber na warda di polis pa maltrato grave. Ambulance a tuma encargo di e dama, y paramediconan a pon’e den ambulance y posteriormente hib’e Hospitaal pa mas atencion.

Na Hospital, un dokter a tuma declaracion di e dama y esaki lo por wordo uza contra e homber den proceso legal riba denuncia di maltrato.