ORANJESTAD (AAN): Un situacion inusual a keda registra siman pasa, ora cu den oranan di merdia un persona riba tereno di De Palm Tours na Eagle,
a logra drenta den un di e Busnan aki staciona riba nan parkinglot.
No ta conoci si el a haya e Bus ya caba cendi of no, pero el a logra di sali cune for di e area di Frankrijkstraat, subi caya, dal y rasca full banda robez di e Bus contra muraya, y core bay y desaparece cu e Bus.
Mesora e personal di De Palm Bus a core notifica Central di Polis di loke ta pasando. Asina a core notifica patruyanan di Playa cu un hende homber a caba di horta un bus grandi di De Palm Tours.
Kizas e homber tras di stuur no sa, pero tur Bus di De Palm Tours tin GPS-Tracker instala, y cada seconde ta transmiti su ubicacion.
Pues via di telefon cu Central di Polis, e empleadonan di De Palm Tours tabata mira e lugar unda e Bus ta coriendo y tabata notifica Polis. Patruyanan e ora a cuminza move cu mas precision.
E joyrider a keda core cu e bus Volvo Marcopolo blanco cu numbernan T-23 y tambe O-93 door di area di Eagle, pa drenta den Madiki, y cuminza pasa den Rancho kizas cu intencion di bay Socotoro. Diripiente el a bira for di Emmastraat bira na su man robez y drenta Argentiniestraat y a stop. Den un frega di wowo Polisnan a yega eynan.
Mesora autoridad a logra detene, y a manda busca Vehiculo di Transporte pa bay cu ne. Awor Atraco Team a keda encarga pa sigui cu e investigacion.
