Paramediconan no por a haci nada mas

ORANJESTAD (AAN): Tabata Diamars atardi algo despues di 4:00 pm, Central di Polis a wordo notifica cu un desgracia a

caba di socede na un proyecto di edificio cu ta bao construccion riba Avenida Nelson Oduber, den area di Bubali.

   Central di Polis mesora a cuminza manda unidadnan pa e lugar, como cu e prome melding ta indica cu un piso di beton a basha bin abao, y a cay riba un trahador y e no ta reaccionando.

   Unidadnan di Polis a yega cu urgencia eynan, y a bin haya abao na piso mas abao un homber benta banda di un slab intacto di piso di beton cu a basha bin abao, pero casi no a kibra mes.  Ambulance tambe a yega, y Paramediconan a core baha pa duna prome auxilio.  Pero aki a bin nota cu e persona masculino no tin señal vital mas.  Paramediconan a djis pidi Polis pa manda busca Docter.

   Mientras tanto autoridadnan hudicial a cuminza yega, incluyendo team forensico di BFTO.  Docter Forensico di Polis, esta Volskuil a yega y a constata morto di e homber di inicial Sigmond S. Volk, naci dia 10 December 1971 na Curaçao, pues tin 53 aña di edad.

   E ta traha pa un Sub-Contratista cu ta encarga pa instalacion di e frame di hero di e edificio.  Net ora e ta pasando bao di e piso di beton, e tubonan di sosten (yama “Jack posts) a basha bin abao, hunto cu e pida piso ey.

   Autoridadnan competente a ser informa, y Bureau Slachtofferhulp tambe a yega pa brinda famia e sosten den e momentonan ey.  Tambe a pone personal di Dienst Technische Inspectie (DTI) na altura pa bay check kico a pasa realmente, y traha rapport riba tur asunto.

   Na famia di e fayecido, DIARIO y Cuerpo Policial ta manda palabranan di condolencia.