Homber herida haya abao riba caminda na Shiribana

Victima di Hit & Run

ORANJESTAD (AAN): Tabata Dialuna anochi algo prome cu 10:30 pm, cu Centro di Alarma a cuminza manda un Ambulance, y un unidad di Polis di Santa Cruz tambe a mobiliza pa caminda principal di Tanki Leendert pa Paradera, na altura di e edificio nobo di Subway na Shiribana.

   E prome informe ta indica cu auto a dal un persona.  E unidad di Polis cu a yega, a bin nota cu na e area dilanti Subway tin ningun hende herida.  Nan a pasa, y despues a bira bin bek pariba.  Aki e ora nan a bin nota, cu ta na e T-weg otro banda di Subway, riba e caminda cu ta bay pa Nuñe tin e accident.  Nan a bira bay nort, y na altura di The Good Snack, otro banda di Shiribana 1-A a bin topa cu un conocido di Husticia abao benta riba caminda, y sangrando na cabez.

   E conocido di Polis, di inicial d.M. tabata tiki na tino ainda, y el a bisa cu un auto a pasa dal’e, y a sigui core bay.  E tabatin diferente herida na su cabez y cara cu tabata sangrando.

   Ambulance tambe a yega, y mesora Paramediconan a cuminza analiza e victima, y a dicidi pa pone riba brancard por si acaso e tin weso kibra, y ta bay cu ne pa Servicio di Emergencia na Hospital.

   Polis di Trafico tambe a yega, y hunto cu demas agentenan a check si eybanda tin Security Camera cu lo por a graba loke a socede.  E caso ta sigui bao investigacion.