Casi 60 hende a ricibi boet pa core cu velocidad halto

Hendenan ta primi trot demasiado

ORANJESTAD (AAN): Tin algun chauffeur cu aparentemente ta gusta core auto, pero no ta ni tira bista riba e speedometer den nan dashboard pa nan mira ta con rapido nan ta moviendo.  Corda bon, ningun caminda na Aruba bo mag di core mas cu 80 km/h, excepto e pista di Palo Marga Raceway Park.

   Liliana Rasmijn kende ta vocero di Cuerpo Policial, a relata cu Diamars den oranan di atardi y anochi patruyanan di Oranjestad hunto cu polis Motorisa a tene un control na diferente puntonan strategico.

   A enfoca e control riba velocidad halto den trafico. Na final di e anochi a reparti un total di 62 multa na e chauffernan.

   E multanan ta como lo siguiente: Como 2 boet ta pa rijbewijs, 1 boet pa faha di seguridad y 59 pa velocidad halto.

   Segun vocero, sigur por spera mas di e controlnan aki durante dianan nos dilanti.

   Un recordatorio pa bo tin bo documentonan na ordo y apelacion ta bay pa nos comunidad pa baha e velocidad den trafico. Nos ta boga pa un trafico sigur pa asina nos tur por yega cas cerca nos sernan keri.