Vocero di KPA, Liliana Rasmijn:
*Den tur dos caso tin multa!
ORANJESTAD (AAN) – Den entrevista cu Matutino DIARIO, señora Liliana Rasmijn, Vocero di Cuerpo Policial, a informa cu awe, Diaranzon 1 di October, polis lo cuminsa controla rond di Aruba, e numbernan bieu riba auto, pues pa tur automobilista tene cuenta cu esaki.Esnan cu NO tin plachi blauw cu blanco por haya multa. Tambe lo duna boet na esnan cu wordo haya cu plachi blauw cu blanco falso (traha cu computer of sticker).
“Cuerpo Policial kier recorda tur automobilista cu awe, dia 1 di October, manera cu a anuncia un par di siman atras, hunto cu Departamento di DIMP, bo mester tin bo mester tin e plachi number nobo, esun color blauw cu blanco, pa aña 2025, poni riba vehiculo di motor”, Liliana Rasmijn a bisa.
El a reitera cu manera ta conoci, KPA ta controla tur momento di dia, y na unda cu enberdad, mirando cu e aña aki a haci cambio cu plachi number nobo, Departamento di DIMP a zorg pa mayoria di esnan cu a haya afspraak, a haya nan plachi di number, y a duna suficiente tempo na unda cu ya tur hende a wordo avisa un par di siman atras, cu entrante awe 1 di October tin cu zorg pa tin nan plachi number nobo di 2025, pega riba bo auto.
“Haci esaki pasobra bo ta evita, e ora ey, cu bo por haya un multa. Di nos banda, di Cuerpo Policial, manera boso sa caba, control lo keda tuma lugar, nos ta controla tur momento di dia, y no mester ta specificamente den un fin di siman, un atardi, un anochi, e por ta cualkier momento. Pues, pa evita un multa wak pa bo tin bo papelnan manera nos ta bisa semper, wak pa bo tin un rijbewijs y seguro valido, bo number di auto paga, e plachi number nobo pega riba bo auto, y tambe e keurings card na ordo”, Liliana Rasmijn a enfatiza.
