Homber di edad grandi a hinca su mes den garganta

ORANJESTAD (AAN): E dia di Diasabra, pa algun hende den cierto situacion, e dia no a habri bon pa nan. 

E prome caso serio a keda registra na salida di solo na Coba Lodo, unda un homber di 34 aña a wordo mata door di su mesun primo.

   Algun ora mas laat, despues di 10:00 am, Polis a core manda patruya di Playa cu urgencia pa Katunastraat, na e parti di e caya cu ta finaliza cerca di Solito, como cu prome informe ta indica cu un adulto mayor a herida su mes malamente.

   E prome unidad cu a yega, a bin topa cu un situacion fastioso, debi cu e homber aparentemente a hinca su mes den garganta.

   Ambulance a yega basta rapido, y Paramediconan mesora a actua, debi cu nan a mira e seriedad di e herida, pa move inmediatamente cu e victima direccion Servicio di Emergencia na Hospitaal.  Nan a haci esaki, sin mishi of saca e cuchiu cu keto bay ta pega na e garganta.

   Den casonan asina, semper laga e obheto y no mishi cu ne, debi cu un hende sin conocemento cu bay saca esaki, por causa un daño peor y sangramento mas profuso.

   Cu urgencia a bay cu ne pa Hospital.  Con serio e hinca ta y si e ta core peliger di morto no ta conoci, debi cu ta mantene secrecia di pashent.  Ademas tampoco no ta conoci kico ta e motibo cu a escala den e situacion di herida su mes.