Habitante a mata su propio primo kende a yega su cas pa bringa cu ne

Drama di famia a culmina na Coba Lodo

• Sea el a wordo tira of a dal su cabez cu obheto fuerte
• Habitante a huy pero despues a entrega su mes 

ORANJESTAD (AAN): E prome yamadanan a cuminza drenta Diasabra pa 6:07 am na Central di Polis, indicando cu hendenan ta tende tiro.  Otro a yama y bisa cu tin algo pasando dilanti un cas na Coba Lodo.  Inmediatamente Central a cuminza manda diferente unidad di patruya di Santa Cruz pa eynan.  Unidadnan di Recherche tambe a cuminza mobiliza pa eynan.

   Yamada a drenta pa indica, cu abao dilanti cura di e cas, tin un homber benta abao pecho na halto cu no ta reacciona.

   E prome unidad di Polis cu a yega na e adres Coba Lodo 2-C, enberdad a bin haya un motorcycle benta abao banda di caminda, y como 2 meter dilanti porta di garage, tin un homber benta abao cu short cora bisti.  E persona cu golpi y cabez tur na sanger no tabata reacciona.

   Ambulance tambe a yega, y Paramediconan a core bay check e persona eybao, pero e no tin ningun señal vital mas.  Nan a informa Polis cu tin di bay yama Docter pa e bin constata morto, como cu nan mes no por haci nada mas pa e victima.  E unidad di Ambulance e ora a retira di eynan.

   Polis a cuminza pidi pa presencia di demas autoridad halto, y tambe a pidi pa Bureau Slachtofferhulp yega eynan.  Tambe a pidi pa presencia di Fiscal, mientras cu Recherche a pidi pa team forensico di BFTO aparece.

   Docter Voskuil di Team Forensico di Polis a yega, y a constata morto di e homber Rene Joell Paesch, naci dia 30 November 1990 na Aruba, pues tin 34 aña di edad.

   Diferente persona eybanda a duna Polis nan version cu nan a tende tiro.  Pero e forma con e cabez di e victima a keda, ta parce cu mas bien a dal e cu un obheto fuerte y contundente.  Su craneo a sufri fractura debi na e impacto aki.

   Kende ta e agresor e momento ey tabata dificil pa conclui.  E victima Rene Paesch tin un eterno conflicto cu su primo yama Israel Paesch, kende ta como 5 aña mas grandi cu ne.  Pero e no tabatey mas na e cas ora cu Polis a yega.  Paden di e cas tabatin un otro primo, kende tabata calmo.  Fiscal a yega y duna ordo pa Polis drenta e cas y detene e primo aki pa asina e wordo interoga pa haya sa si acaso e ta envolvi of no.

   BFTO a yega pa asina saca diferente potret, documenta diferente obheto haya benta abao, pa asina e caso ta wordo poni cu precision riba papel.  E motorcycle benta abao cu cual Rene a yega na cas, y tambe un Suzuki Swift cu tabata staciona net paden di porta di cura, a wordo confisca pa investigacion.

   Fiscal a duna ordo pa confisca e curpa, y lo tin di practica autopsia riba dje pa asina haya sa e causa exacto di morto.  E investigacion ta den man di Recherche di Santa Cruz pa sa kico exactemente a sosode.

   Vocero Liliana Rasmijn di Polis, a bisa cu te cu awor no por bisa door di kico e victima a fayece y investigacion lo mester saca afor esaki.

   Agresor a entrega su mes: Diasabra atardi laat na bahada di solo, Recherche di Santa Cruz a acudi na e mesun cas na Coba Lodo y aki e sospechoso Israel Paesch a entrega su mes.  Autoridad a nota cu su cara ta yena cu monton di golpi, pero su aresto a bay trankil y facilmente a pone boei na su mannan.

   Recherche conoce e primonan Paesch aki basta bon, debi na e hecho cu nan a yega di ricibi castigo di prison pa varios crimen cometi den pasado.  Ta parce cu ta mesun crimen aki lo a pone cu e conflicto entre Israel y su primo Rene a keda escala, di cual uno ta keda acusa e otro.

   E cara tur na bolombonchi di Israel a bin debi na e hecho cu Rene a dal e masha mahos mes riba parkinglot di un conocido Club Nocturno na Noord apenas algun ora prome cu e crimen a wordo cometi.

   Vocero Rasmijn a bisa, cu Cuerpo Policial ta haci un suplica, si acaso abo a mira of sa algo pa yama e tiplijn di polis cu ta 111-41. Corda cu nan ta garantiza cu bo ta keda anonimo.

   DIARIO y tambe Cuerpo Policial Aruba ta manda palabra di condolencia na famia di e fayecido.