Motociclista cu a huy pa Polis a bay dal den vehiculo

Nan a haya arma di candela den su poder

ORANJESTAD (AAN): Diabierna anochi algo pasa di 9:00 pm, riba Green Corridor na altura di rotonde di Mahuma, un brommer a dal contra un pickup cu tabata birando riba e rotonde.

   A resulta cu e motorcycle aki tabata wordo persigui door di unidad di Polis motoriza.  E oficial riba motorcycle a mira e persona coriendo, y a dun’e señal pa stop.  Pero e motociclista a ignora esey, y mas bien a primi trot pa purba huy.

   Asina a cuminza cu un persecusion, pero na e rotonde el a bay dal contra un Pickup Double-Cab color blanco.  Debi na e impacto, e motociclista a resulta herida y a keda benta abao banda di su motorcycle.  Polis a pone su mannan den boei, sperando yegada di Ambulance cu a wordo pidi.  Ora cu Polis a listra e persona, a bin haya un arma di candela den su poder.  Esaki mesora a wordo confisca, y entrega na Team Forensico di BFTO pa investigacion.

   Paramediconan a control’e pa asina atende e heridanan leve cu el a ricibi.  Nan no a bay cu ne pa Hospital.  Polis a pidi yudansa di CEA, cu a bin cu nan vehiculo.  Esey ta debi cu 2 di e Vehiculonan di Transporte di Polis aworaki ta defecto.