Hoben Rayden Kock di 17 aña tira mata den Hot Zone

Cu tiro den cabez

• Investigacion grandi a start pa investiga asesinato den parkinglot
• Un siman prome nan a confronta otro eynan caba 

ORANJESTAD (AAN): Testigonan a splica cu weekend cu a pasa, ya caba e mesun personanan aki a haya conflicto riba e parkinglot grandi di The Village Mall, cu ta e area di negoshi unda tin e.o. Fat Tuesday y tambe Papillon Restaurant.  The Village Mall ta situa otro banda pariba di caminda fo’i Hilton Aruba Resort.

   Ta parce cu e mesun personanan a bolbe na mesun lugar, pero Diadomingo marduga esaki a finaliza den tiramento y cu na final a costa bida di un hoben menor di edad.

   Algo despues di 1:15’or di marduga, hendenan a tende multiple sonido di tiro, glas ta kibra, y a mira coremento na e parti zuid di e parkinglot, apenas 12 meter pazuid di salida cu afdak di e Mall.  Esaki a comberti su mes den un momento di panico tanto pa hendenan local y pa turistanan, cu a core na pia pa aleha di e area.  Varios di nan a bin despues cu diferente version di loke nan a mira.

   Varios tiro: Pero hecho ta cu un persona masculino cu arma di candela den man a tira, y keda tira riba un persona hoben, te ora cu el a cay banda di autonan staciona, y no a reacciona mas.  E hoben a keda benta eybao riba su banda robez, cu impactonan di bala cu a ocasiona sangramento na cantidad.

   E persona cu a tira mes, testigonan a bisa cu el a core drenta den un auto color cora, cu a huy di e lugar cu velocidad halto.  Esaki ta algo cu ta varia cerca algun testigo.

   Pa exactamente 1:18 am e prome yamada a drenta na Central di Polis, unda hendenan ta splica cu tiramento a caba di socede y cu tin hende abao benta.  Esaki a pone cu tur unidad di Noord, y demas unidadnan special riba caya, incluyendo patruyanan motoriza a mobiliza pa e area di Hot Zone aki.

   Polis a dicidi na blokea e salida di e parkinglot, y otro unidadnan a bay check loke a socede, y a bin topa cu e victima benta abao net banda di un Nissan Note hatchback color shinishi.  Mesora a mira cu e hoben aki tin un impacto di bala na su cabez y no ta reacciona mas.

   No tin señal vital: Ambulance tambe a yega un rato despues, y mesora Paramediconan a bay check e victima cu e ora tin un plas di sanger rond di su cabez.  Nan a nota cu e no tin ningun señal vital mas, y a solicita Polis pa busca Docter.

   Mientras tanto, tur demas autoridad halto a wordo poni na altura, incluyendo Recherche, team forensico di BFTO, y tambe a yama Bureau Slachtofferhulp.

   Varios Polis a cuminza tuma declaracion di testigonan, y otronan a cuminza ilumina e caminda enbusca di huls, y a ricibi varios cerca di e victima.  Pero hasta como 15 meter mas pariba, a bin haya dos huls benta abao riba caminda.

   E victima: Poco rato despues, Docter Forensico a yega eynan, y el a constata morto di e victima.  Un ruman di e victima tabata presente y posiblemente el a mira tur cos cu a socede.  El a identifica e persona morto como Rayden K.A. Kock, naci dia 3 di Juli 2008 na Aruba, pues tin apenas 17 aña di edad.

   Testigonan a splica cu e victima Rayden ta un hoben kende semper ta mustra hopi respet na tur hende, y for di chikito tabata hunga Futbol hubenil cu team di SV Dakota.  Pero algun hende a informa Polis cu ultimo temponan den su edad di teenager, el a cuminza anda cu cierto grupo di bario di Brazil y un individuo kende ta un conocido di husticia.

   Recherche ta investigando si acaso esaki lo por ta un caso di gang vs. gang, pero ta sigui check tur posibilidad, incluyendo e informacion cu e victima y mas hende a haya conflicto un siman prome caba den mesun parkinglot di The Village Mall.

   Autoridad a ricibi un nomber cu lo por ta e persona cu a tira, pero no ta dunando detaye pa no stroba investigacion.  Ta bay check tur security camera cu por tin den e area, pa check si e victima lo a haye den problema mas prome den un of mas establecimento nocturno eybanda.  Tambe lo revisa tur Security Camera di Polis instala riba Boulevard pa por identifica e auto cu lo a huy bay for di The Village Mall.

   Famianan inconsolabel: Ora cu famia di e victima a yega eynan, e sucedido a bira un shock grandi pa nan.  Nan no por kere cu Rayden ta eybao benta sin bida, un hoben den pleno flor di hubentud cu hopi plan pa su bida.

   Bureau Slachtofferhulp aki a duna nan e sosten necesario den e momento duro aki.

   Personal forensico di BFTO a documenta tur e area, nota tur detaye, y check tambe e.o. autonan cu lo por a ricibi daño di impacto di bala.

   Despues cu a haci tur investigacion eybao, a laga shersh di Aurora Funeral Home lanta e victima di eybao y bay cu ne.

   Te na ciere di edicion, ainda DIARIO no a ricibi informacion si acaso a logra detene sospechosonan den e caso aki.  Vocero Liliana Rasmijn di Polis ta rogando comunidad pa yama Tipline di Polis pa duna tip di e caso aki, y corda cu nan ta garantiza cu bo ta keda anonimo.  E caso ta demostra cu ainda tin arma di candela ta circulando, ni maske con grandi a tene campaña pa pidi hende entrega nan arma.

   Na famia di Rayden, tanto DIARIO como Cuerpo Policial ta manda nan mas profundo palabranan di condolencia.