Den un solo atardi y anochi a reparti 111 boet na automobilistanan

Un persona a keda deteni tambe

ORANJESTAD (AAN): Tabata Diahuebs 21 di Mei 2026 durante oranan di atardi y despues anochi , polis di distrito di Oranjestad hunto cu e Unidad Motorisa a tene control  di trafico den distrito Oranjestad.

   E controlnan a tuma lugar na diferente puntonan strategico.  Na final di e control ora a haci conteo, a nota cu en total a duna un total di 111 boet. Tambe polis a detene un persona pa maneha un vehiculo sin un rijbewijs.

   E boetnan reparti tabata entre otro:  (*) No tabatin un rijbewijs valido. (*) No tabatin keuringskaart na ordo. (*) Falta di pago di impuesto di vehiculo di motor. (*) No tin seguro valido. (*) No a uza safety-belt.  (*) Luz dilanti defecto.  (*) No a uza señal y mucho mas.

   Cuerpo Policial ta enfatisa cu e controlnan lo keda tuma lugar.

   Ta haci un suplica a tur automobilista pa percura pa tur documento di vehiculo di motor ta na ordo y pa cumpli cu e reglanan di trafico. Un trafico sigur ta responsabilidad di nos tur.