Hoben di 25 aña a kima auto di su tata na Sero Compa

ORANJESTAD (AAN): Tabata Diasabra algo prome cu merdia, cu Central di Polis a manda un unidad di Polis di Santa Cruz cu urgencia na un adres na Sero Compa, como cu eynan tin un hoben cu a bira demasiado agresivo.

   Sero Compa ta un area entre Cadushi Largo y Kas Ariba.  Autoridad a bin corda cu e mesun hoben aki, mas trempan riba Diasabra a confronta problema den otro distrito, esta na Sabana Liber na Noord.  Di eynan el a hasta bay Servicio di Emergencia na Hospital, y eynan tambe e lo a busca problema cu tur hende.

   Despues di tur esey, e situacion no a mehora.  Pasobra di Hospital bayendo bek na Sero Compa, cu ta unda e ta biba, atrobe aki discusion a start entre e hoben y su tata.

   E agresividad e biaha aki a escala di tal forma, cu e hoben a dicidi na pasa man pa un jerrycan cu gasolin, basha esaki riba un auto, y asina cende e auto compacto Toyota Vitz color blauw cu ta pertenece na e tata.  Ora cu Polis a yega, nan a bin nota cu vlamnan grandi tabata sali for di e parti dilanti di e auto, y tabata hasta bay na wayanan di NV Elmar.  Pesey Polis a pidi no djis presencia di Cuerpo di Bombero, sino tambe di Elmar.

   Cuerpo di Bombero na yegada mesora a cuminsa paga e candela.  Como cu e biaha aki si el a bay mas extremo, Polis a detene e hoben di 25 aña pa destruccion di e auto.  El a wordo hiba pa Warda di Polis na Macuarima.  No tin indicacion si acaso e ciudadano lo entrega keho contra su yiu homber.