Persecusion tras di Nissan Cube
ORANJESTAD (AAN): Diadomingo marduga banda di 4:40 am, net ora cu unidad di Polis di Noord ta pasando cerca di e caminda cu ta sali dilanti My Fitness Aruba na Noord, nan bista a bay riba un auto compacto Nissan Cube color plata, cu tabata staciona algun meter pariba di e Gym aki. E auto a start y e chauffeur a ranca sali cu velocidad halto di su espacio di staciona. Polisnan a tende mesora dos golpi fuerte tras di otro. Tambe a nota con hendenan spanta a cuminsa grita.
Mesora Polis a core bay tras di e Nissan Cube aki, y nan a mira con e chauffeur ta coriendo roekeloos riba caminda, y tabata sigui primi trot. Polisnan a sende nan zwaailicht cu sirena, y a sigui bay su tras.
Polis a duna e chauffeur un señal pa stop, pero e no a preocupa. El a sigui core bay pabao te na cruzada di Palm Beach, y a bira bay nort rumbo pa Monserat, pasando banda di Ling’s Restaurant. El a sigui bay nort te na e T-weg, unda e caminda ta sigui y haya nomber Caya Calco.
E chauffeur di e Nissan Cube no a stop na e T-weg aki, y a djis subi y basha e cura abao di e lugar eynan, y no por a sigui mas. Mesora Polis a duna e chauffeur orden pa e paga e motor, y sali.
Ora cu a puntre pa su nomber, el a duna inciial K. Despues di esey Polisnan a mande suela pa por tine bao controla.
El a sigui bisa cu el a dal contra dos auto, y esaki a dune rabia, y pesey el a dicidi core bay. A base di esaki, Polis a detene K. pasobra el a viola Articulo 4 inciso 2, tambe Articulo 10 inciso 1, y Articulo 5 di Ley di Trafico.
E acusado di Hit & Run a wordo hiba Warda di Polis.
