Grupo di bringador a zwaai boter y herida un persona inocente cu kap na cabez

ORANJESTAD (AAN): Diasabra marduga, yamadanan a drenta na Polis pa splica cu den area di South Beach Center tin un bringamento andando, y cu un hende a keda herida.

   Mesora unidad di Polis di Noord a mobilisa pa e area, y na yegada a bin topa cu un hoben cu tin un kap superficial na su frenta.  Polis a cuminsa papia cu varios persona y tambe cu e victima, y a bin compronde cu el a bira victima di maltrato ocasiona door di rumannan di fam Wiliams.

   Pero ta parce cu e victima no tabata envolvi den e pelea original.  E ta djis para na banda, y pa malasuerte el a ricibi un boter den su direccion y causa e herida na su cabes.

   Paramediconan a wordo yama pa yega eynan, y nan a check e kap na e frenta di e hoben, y a constata cu esaki ta basta superficial.  Nan mes a limpia e herida y pone verband na dje.

   Polis tambe a papia cu e victima, y nan a bise cu e por dicidi si acaso e ta bay entrega keho oficial di maltrato.  Nan a mustre cu e por bay na Warda di Polis na Shaba unda e por entrega keho oficial cerca Recherche.

   Despues cu paramediconan a atende e victima, e por a baha bek di Ambulans, pues no tabata necesario pa el a bay Hospital.   Polis a traha un rapport di e sucedido.