Accident fuerte na cruzada di Kadushi Largo cu diferente hende herida

ORANJESTAD (AAN): E golpi cu a wordo sinti Diadomingo merdia cerca di e crusada Kadushi Largo cu Sero Compa, a pone cu mesora yamadanan a cuminsa drenta na Central di Polis, pa alerta cu un accident basta fuerte a socede.

   Mesora Central di Polis a manda un patruya di Santa Cruz rumbo pa e cruzada pa asina check kico ta pasando.  A drenta informacion cu tin hende herida, y pesey Centro di Alarma a wordo avisa tambe, y a manda Ambulans pa eynan.

   A resulta cu e accident ta entre un Auto y tambe un Vehiculo.

   Polis a yega, y bin topa cu e dalmento ta entre un vehiculo SUV tipo Chevrolet Tahoe color preto cu number A-69141, y un auto compato Nissan Tiida color shinishi cu number A-62672.  A nota cu e vehiculo SUV, y tambe e auto compacto a ricibi basta daño material, y cu tin hende herida.  Esnan cu tabata den e SUV a ricibi tiki proteccion di airbag cu a sali full rond di nan.  Nan a baha y bay sinta riba beach chair banda di caminda sperando riba Ambulans.  Pero den e Tiida tabatin hende herida paden ainda tras di stuur.

   Esnan mas herida a resulta e ocupantenan den e Nissan Tiida, y pesey na yegada di Paramediconan mesora a cuminsa duna ayudo na nan.

   Debi na e embergadura di e accident, a pone Specialista di Trafico di Polis acudi eynan pa e haci e investigacion riba e causa exacto di e desgracia.

   E unidadnan di Ambulance cu a yega mester atende cu tur e heridonan y alavez transporta esnan cu mester bay Hospitaal pa tratamento mas avansa.