Accident fuerte a laga chauffeur hoben herida na Piedra Plat

ORANJESTAD (AAN): Tabata Diasabra merdia, cu Central di Polis a dirigi patruya di Santa Cruz cu urgencia riba e caminda di Piedra Plat pa Sero Pita,

na altura di e T-Weg cu ta bay pa Casibari pa check un accident cu hende herida.  Pues esaki ta un tiki pariba di Centro Kibrahacha.

   Ora cu Polis a yega, nan a bin topa cu un auto y un vehiculo kibra, y abao net dilanti cas Piedra Plat 25 tin un persona masculino hoben herida drumi abao riba tera.  Tabatin hende cu clechi blanco cu tabata tapa un tiki solo pa e victima.

   Polis a haya sa, cu e persona herida tabata chauffeur di un auto compacto Kia Soluto color blauw scur cu V-nummer riba dje.

   E otro ta un vehiculo SUV modelo Hyundai Santa Fe color shinishi scur.  For di prome bista ta mustra cu no a duna preferencia na e T-Weg aki.

   Ambulans a yega rapido, y Paramediconan mesora a cuminza duna asistencia pa stabiliza e pashent, y posteriormente a lant’e di eybao pa asina dirigi cu urgencia pa Servicio di Emergencia na Dr. Horacio Oduber Hospital.

   Polis di Trafico tambe a yega pa asina investiga e accident.  E Hyundai Santa Fe a dal fuerte den e parti banda pasahero di e Kia Soluto.