Dos persona herida Diasabra atardi den accident na Boegoeroei

ORANJESTAD (AAN): Un impacto fuerte a wordo registra Diasabra atardi banda di 3:00 pm, riba e caminda di Playa pa Noord,

net na altura di e sucursal di DeWit & VanDorp na Boegoeroei 93.

   E prome yamadanan cu a drenta na Central di Polis ta indica cu tin hende herida.  Pesey a core manda Polis di Noord pa e lugar, y tambe a despacha dos Ambulans.

   E prome unidad di Polis cu a yega, a bin topa cu e situacion unda un Toyota Corolla color blanco y un Toyota Yaris color shinishi a dal den otro, y ambos chauffeur ta herida.

    Testigonan a splica cu e Toyota Yaris maneha pa un persona di edad grandi, a subi caminda for di banda pariba, y no a mira cu e Toyota Corolla tabata acercando.

   Paramediconan a opta pa bay cu e persona di edad cu urgencia pa Servicio di Emergencia na Hospital.  E chauffeur di e Corolla  wordo atendi na e lugar mes door di paramediconan.  Polis di Trafico a yega pa asina investiga e accident.