ORANJESTAD (AAN): Diasabra anochi pasa algo pasa di 10:00 pm, un unidad di Polis di Noord
a wordo manda na un Nightclub riba Irausquin Boulevard pa check un caso unda un homber a maltrata su ex-pareha.
Debi na e maltrato fuerte aki, e dama a haye ta bay sconde den e club nocturno, y aki a bati alarma.
Mientras cu unidad di Polis ta yegando na e club nocturno, nan tabata ricibi extra informacion di e homber, esta cu el a huy den cierto auto. Y pa suerte, un unidad di Polis a topa cu e auto ai riba caminda. Mesora e unidad di Polis a duna e auto un señal pa stop.
Sinembargo e chauffeur no a stop, y mas bien a primi trot y a aumenta velocidad. Polis mesora a cende nan zwaailicht y sirena y bay tras, y a notifica demas unidadnan di e persecusion cu a start tras di e agresor.
E auto a sigui core bay, y e chauffeur finalmente a stop auto na su cas na Bubali. Kizas el a pensa cu aki e ta safe.
Pero Polisnan a yega y mesora a detene, y acuse di a viola varios articulo di Codigo Penal, incluyendo no a sigui ordo di Polis.
A manda busca Vehiculo di Transporte, cu a transporta e homber rumbo pa Warda di Polis na Shaba, unda el a ser presenta dilanti Fiscal Auxiliar. El a duna ordo pa e keda deteni pa asina por haci investigacion.
Tambe lo bay check e situacion di e dama herida, pa asina haya su splicacion y tambe ricibi rapport medico di su asunto. E homber sigur a pasa weekend cera den cel.
