Dos auto envolvi den accidente serio na Avenida Nelson O. Oduber

ORANJESTAD (AAN): Diadomingo poco prome cu 12:30 di anochi, informacion a drenta na Central cu dos vehiculo tabata envolvi den

e accidente riba Avenida Nelson O. Oduber. Informacion inicial tambe a indica cu un di e autonan a bolter y por tin persona pega aden, motibo pa cual a wordo solicita presencia di Brandweer pa yuda den e operacion.

Segun version di un di e chauffeurnan envolvi, cu tabata na stuur di un Nissan Fairlady, na momento cu e tabata pasando, of den proceso di pasa, un Suzuki Swift color cora, su auto a 'touch' e Swift.

E contacto entre e dos vehiculonan aparentemente a causa cu e chauffeurnan a perde control di nan auto. E Suzuki Swift a bolter, mientras cu e Nissan a eventualmente a termina den e greppel di caminda.

Unidadnan di Ambulance a yega na e lugar pa atende e heridonan, y despues di e controlnan medico necesario, solamente e dama cu tabata den e Suzuki Swift a wordo transporta pa Hospital pa un control adicional.

Segun informacion na e lugar, velocidad posiblemente halto por a hunga un rol den e accidente. Polis di Trafico a cera caminda y ta investiga e accidente.