Tres detencion di hende local y Jamaiquino
- Tambe a confisca hopi placa na Sero Patrishi y Pos Chiquito
- Unidad di Crimen Organiza ta investigando caso profundo
ORANJESTAD (AAN): Autoridadnan a haya luz berde di Ministerio Publico, y riba Diabierna nan a tene razzia na dos diferente cas na Aruba. Vocero Liliana Rasmijn a confirma esey.
E biaha aki, ta Unidad di Crimen Organiza (UGC) di Cuerpo Policial di Aruba, conhuntamente cu Recherche Samenwerkings Team (RST) a ehecuta e razzia aki. Durante e entrada hudicial aki, nan a haci un total di tres detencion.
DIARIO a haya sa cu ta trata aki di dos homber Arubiano y un homber Jamaiquino. E accion di e funcionarionan hudicial aki y e detencionnan aki ta relaciona cu un investigacion grandi di crimen organiza.
Polis a confirma cu e prome razzia a tuma lugar na forma sorprendente na un cas na Sero Patrishi. Despues di esey, nan a tene un razzia pariba di brug, esta na Pos Chiquito.
Durante e entradanan hudicial, a tene un listramento extenso den ambos cas, y nan a confisca un cantidad grandi di droga como tambe placa.
Investigacion ta continua y no ta descarta cu por tin mas detencion. Pa awor e interogacionnan ta sigui den e caso aki.
Cuerpo Policial Aruba ta haci un suplica na ken cu sa algo of a mira algo pa yama e Tipline di Polis cu ta 111-41, y Cuerpo Policial ta garantiza cu bo ta keda anonimo.
