Marduga crimen cometi na un apartamento
ORANJESTAD (AAN): Tabata Diabierna madruga pa mas o menos 1:45 am, cu Central di Polis a ricibi yamada urgente, indicando cu un atraco a caba di socede.
Mesora a cuminza despacha e patruya di Oranjestad pa un apartamento situa na Cumana. E prome informe ta cu lo ta trata di un atraco.
Na yegada di patruya na e adres, e agentenan a wordo acerca pa un hende homber kende a declara cu un rato prome e lo a wordo atraca pa 3 hende homber. Un di nan tabata tin un arma di candela. E sospechosonan lo a agredi’e cu e arma di candela door di dal’e tras di su nek.
Ademas di e atake violento aki, e sospechosonan a pasa y piki bay cu su pertenecianan. Ta trata di varios prenda, manera e.o. cadena, renchi, y holoshi, y fuera di esey a bay cu placa cash.
Polis a wordo informa, cu e trio di atracador aki tabata bisti na paña scur y cu cara tapa. Nan lo a papia papiamento y spaño, y despues di a comete e crimen, nan a huy na pia.
E oficialnan di Polis a transmiti detayenan importante aki pa demas unidad policial riba caya, y tambe nan a pidi ambulance pa e victima pa asina bay cu ne pa Servicio di Emergencia na Hospital pa nan por control’e y dune e asistencia medico necesario.
Polis a pidi pa presencia di Atraco Team cu a yega na e adres, y tambe a busca team forensico di BFTO pa yega eynan y haci nan investigacion.
Cuerpo Policial Aruba ta haci un suplica na esnan cu por sa algo of a mira algo, pa yama e Tipline di Polis cu ta 111-41. Corda cu bo ta keda anonimo.
