Dos accion riba lama dilanti Curaçao pa intercepta transporte di 1.790 kilo di cocaina

ORANJESTAD (AAN): Den fin di siman cu a pasa, personal di Wardacosta di Caribe Hulandes a logra intercepta dos diferente cargamento di droga,

y total di 7 persona stranhero a keda deteni.  E cantidad di droga confisca a suma na 1.790 kilo di cocaina.

   E dos casonan aki a socede como 3 ora leu for di otro.

   Tabata Diasabra mainta trempan, cu e avion patruyero Dash-8 di Wardacosta a detecta un speedboat tipo Go-Fast ta moviendo riba Lama Caribe.  Wardacosta a core manda e station-schip, esta Zr.Ms. Holland rumbo pa e area, y nan a saca nan botonan di intercepcion rapido, esta FRISC cu a bay katan-katan riba nan.

   Ora cu e cuatro tripulantenan abordo di e Go-Fast a mira cu Wardacosta ta acercando, nan a cuminza zwaai cantidad di bulto riba lama, y a sigui core.  Despues nan a para e boto, y a entrega nan mes.  E cuarteto aki ta 3 Venezolano y 1 Colombiano, y nan tabatin 1.290 kilo di cocaina abordo.

   Despues cu a pisca tur bulto di droga for di lama, y a hisa nan abordo di e barco Zr.Ms. Holland, y cu nan a sigui nabega, diripiente e marine-radar abordo a detecta un otro Speedboat tipo Go-Fast ta moviendo den e area.  Atrobe a manda e botonan FRISC nan tras.  Pero e biaha aki, e tripulantenan di e Go-Fast a mira autoridad ta yegando, y nan a dicidi pa trata na huy.  Nan no kier a rindi, y a cuminsa benta bultonan di droga riba lama. 

    A manda tiro di advertencia, pero ni esey no a yuda.  Finalmente a usa francotirado pa mik riba e Outboard Engines di e Speedboat y asina a destrui nan.  Mesora e boto a stop di mobiliza.  Abordo tabatin 3 Venezolano riba e Go-Fast y nan a keda deteni.  Personal di boto a recoge tur bulto tira den lama, y esaki a yega na un peso di 500 kilo di cocaina.

   E sospechosonan y e droga di e prome cargamento a wordo entrega na Cuerpo Policial di Curaçao.  E droga y sospechosonan di e di dos cargamento a wordo entrega na Cuerpo Policial di Bonaire.  E droga cu a wordo confisca ya caba a keda destrui.