Baby di 6 luna herida den accident na Bubali

ORANJESTAD (AAN): Diasabra merdia Central di Polis a manda unidad di Polis di Noord rumbo pa Caya Imelda Eckmeyer-Bermudez, specificamente na Bubali pa un accident entre tres auto.

   Ora cu e unidad di Polis a yega, a bin topa cu e accident aki dilanti E Boco Bar & Restaurant.

   Polisnan a wordo informa mesora door di mirones, cu un adulto y un baby a resulta herida, pero bon mes nan no ta di gravedad.

   Hecho ta cu un SUV tipo Mitsubishi ASX color preto cu number A-18897 bayendo direccion pariba rumbo pa Shaba, a bay sorteer y bira na su banda robez, siendo cu tin un auto sedan MG GT Sport sedan color blanco cu number A-64797 ta bin for di direccion contrario.  Parce cu e chauffeur di e Mitsubishi no a ripara mes cu tin auto ta bin, y a bira sin duna preferencia.

   Esaki na su turno a pone cu e chauffeur di e MG reacciona pa evita un impacto, y a hala na su man robez, sin cu e tabata sa cu patras di e Mitsubishi tin un Nissan Sentra color shinishi cu number A-35612 tambe ta bayendo pariba.  Resultado ta cu e MG y e Nissan a dal frontal fuertemente den otro.

    Mas unidad di Polis a yega, y a cera e caminda como cu e stagnacion a dificulta e trabao di autoridad.  A pidi ambulance tambe, paso den e MG tabatin un baby do 6 luna, y un adulto herida.

   Por a mira cu e Mitsubishi ASX a keda para manera cu ora el a baha caminda y no ta mustra cu e vehiculo a ricibi daño.

   Paramediconan ya yegada a trata cu esnan cu tabata tin mester ayudo.