Alumno di Colegio EPI Horeca cu trauma severo na cabez
- Accident a socede 180 meter pariba di Rotonde Aeropuerto
- Hoben a bay den shock abao riba caminda
ORANJESTAD (AAN): Tabata Diamars faltando algun minuut pa 12’or di merdia, cu Central di Polis a dirigi unidadnan pa bay cu urgencia riba Green Corridor, na altura di e Parada di Bus cu tin pariba di Spiral Rotonde dilanti Aeropuerto, pa un accident grave cu a caba di socede.
Yamadanan tabata indica cu auto a dal un hoben masculino y e ta grave. Un unidad policial cu tabata den cercania a yega rapido na e lugar di desgracia, y a bin topa cu un Sub-Compact SUV di marca JAC, modelo T5 CVT color blanco cu number A-556, y abao riba asfalt un hoben seriamente herida. Polis a nota cu e hoben tin uniform di Colegio EPI Horeca bisti.
E vehiculo cu a dal’e, a keda para riba caminda, hopi cerca di e separador di via. E chauffeur a keda sinta den e vehiculo, y aparentemente tambe a haya susto enorme.
Mas Polis a cuminza yega, y tambe Ambulance. A concentra riba e hoben benta abao, como cu tabata bisto cu el a haya trauma na su cabez. E golpi pisa aki y hopi factor mas, tabata mustra cu e hoben a cuminsa bay den shock.
Paramediconan a trata di stabiliz’e, y despues cuminsa pidi pa Polisnan habri caminda pa nan bay cu urgencia pa Hospital.
Un otro ambulance a yega, y paramediconan a bay atende e chauffeur di e vehiculo, y mirando su situacion a dicidi pa bay cune Hospital tambe.
Departamento di trafico y team forensico di BFTO a presenta pa haci nan investigacion. Por a nota cu e vehiculo a haya casi tur golpi na banda robez, kibrando parti extremo di bumper, wantalodo, hood, y e curpa di e hoben a bay dal den e parti robez di windshield y kibra esey.
Aki por mira pues cu e golpinan tabata multiple, y cu esun mas pisa ta e cabez cu a bay dal den windshield. Mirando cu e accident a socede net na e inlet chikito di e caminda pa un Parada di Bus, por indica cu e hoben sea ta bay wardando pa bus, of kizas a caba di baha di bus.
Polis a haci multiple investigacion, a scucha varios testigo, y despues di algo mas cu 1 ora e caminda a worde habri back. E vehiculo JAC di fabricacion Chines a wodo confisca y hiba Warda di Polis na Balashi.
