Desconoci a horta ambulans for di Post na Wayaca Falls

ORANJESTAD (AAN): Un caso peculiar a sosode dialuna anochi ora cu un homber a dicidi di 'joyride' un ambulans na e post ubica na Wayaca Falls.

E homber gewoon a dicidi di subi e ambulans cu tabata para pafo den parkeerplaats y asina a inicia un odisea cu a finalisa algun kilometer leu, den e bario mes di Wayaca.

Segun informacion, den e ambulans mes, e unidad number  29, tabata tin un paramedico cual a confronta e homber pa locual el a haci y a puntra e homber pa para e ambulans.

Mesora un careda a inicia tambe door di otro coleganan di ambulans cu a wordo poni na altura pa asina por a recupera e unidad.

Na Wayaca mes, banda di e supermarket, door di e presion sigur, e homber a dicidi di para lagando e unidad meymey caminda  y a huy den direccion desconoci.

Varios patruya di polis a yega na e sitio como tambe persona di Ambulans pa atende cu e sucedido, cual ta wordo considera uno basta serio.

Por a tuma nota cu e paramedico den auto a duna su version di locual a pasa, pero tambe pa medio di e camara instala den e ambulans por a identifica e homber cual algun rato despues a wordo gara pa Polis no mucho leu den area di Primavera.

E homber no tabata papia mucho coherente. E lo a bisa cu solamente e tabata kier bay cas pero pa esaki parce el a dicidi pa bay cas na un forma diferente, esta den ambulans.

Un rato despues di a wordo deteni pa polis, e homber mester a wordo atendi tambe pa e paramediconan pasobra el a bira malo ora cu el a wordo hiba warda di polis.

Ta trata di un homber cu tabata papia ingles y cu parce tabata bao di influencia di un le otro substancia.

Un situacion sigur basta singular pa inicia e siman y algo cu sigur awor Departamento di Ambulans tin cu bay analisa pa evita cu algo asina bolbe sosode.