Caso di atraco a pone Polisnan mobiliza den area di San Barbola

Dos atracador den Yanana Supermarket -  ORANJESTAD (AAN): Pa algun tempo por a nota cu tur caso di atraco arma a lens un poco, despues cu autoridadnan hudicial local a sa di resolve algun caso, y a detene par di persona cu ta envolvi.

   Sinembargo Diasabra anochi un biaha mas informacion a drenta di atraco cu a socede.  Y e tabata un momento cu ya caba negoshinan rond di e isla tabata haciendo preparacion pa dentro di algun minuut y ora mas nan ta cerando nan porta y bay descansa.

   Den e bario di Yanana cu ta keda mey-mey di Meiveld cu San Barbola y Sero Blanco, diripiente un auto color blanco a cuminza yega eybanda, y dos persona a baha di dje.  Tin indicacion cu tin dos of mas hende cu a keda sinta den e auto, y motor tambe a keda cendi.

   E dos hombernan aki a cana cu tabata bisti tur na preto, y nan cara ta tapa tambe.  Nan a core y drenta cu rapidez den e negoshi situa na Yanana 14, esta “Yanana Supermarket”.

   E negoshi aki cu a habri alrededor di aña 2015, ta dispone di un solo porta banda dilanti unda clientenan ta drenta of sali.  Via di e porta aki e dos hombernan cu cuero color cla a drenta, y sorprende e cashier na entrada.  Den bon dominio di Papiamento, nan a cuminza exigi pa placa.

   Un di e hombernan aki tin un arma di candela den su man, y e otro tin solamente un cuchiu cu cual e ta menaza cu ne.  Nan a menaza y enfatiza e cashier cu e tin di duna nan placa mesora sino tin consecuencia.

   E cashier a djis saca tur placa cu e tin den e caha, y duna nan.  Nan a wanta e placa aki, y cu mesun rapidez a sali bek pafo.  Esnan eybanda a mira cu nan a drenta un auto compacto color blanco, y a mobiliza bay direccion panort rumbo Sero Blanco.

   Pa exactamente 9:23 pm, e yamada a drenta na Central di Polis di e atraco aki.  Inmediatamente diferente unidad di Polis a cuminza mobiliza pa e area, y a cuminza tira bista riba vehiculonan moviendo na forma sospechoso.

   For di e Supermarket aki tin varios caminda pa sali di e bario, esta e caminda bay nort cu bo ta yega na Sero Blanco, sea cerca di e Paperclip di Watty Vos Boulevard, of bo por ta mas pazuid pa sali mas cerca di Mooi Mooi Minimarket y Colegio EPI.

   Vocero Policial Liliana Rasmijn a indica na DIARIO, cu e atracadornan aki a bay cu e benta di dia di e Supermarket.  El a confirma cu uno tin arma di candela, y e otro ta djis un arma blanco.

   E atraco a laga e propietarionan den shock, y pesey Polis a pidi presencia di Slachtofferhulp pa duna un man.  Tambe a pone Atraco Team na altura di e caso, y a pidi tambe pa funcionarionan hudicial forensico di BFTO presenta pa asina check posible vingerprints laga na e lugar.

   Polis ta pidi cualkier persona cu por a mira algo, of cu kizas tin security video di nan cas eybanda y bo ta mira e vehiculo sospechoso, of e hendenan sospechoso aki, pa yama e Tipline di Polis na 111-41.  Corda cu bo por keda anonimo.

   Despues di e atraco aki, e negoshi a cera su porta pa e resto di anochi.