El a keda deteni na su cas den Caya St. Lucia na San Nicolas - * Cantidad di hende aresta a bira 4 - ORANJESTAD (AAN): E mes ta un persona invalido aworaki desde cu el a keda herida den un caso di tiramento.
Su curpa a keda paraliza, y ta move danki na un rolstul. Pero oficialnan hudicial ta convenci, cu e ta parce di ta e ‘mastermind’ cu a planea y ordena e asesinato riba un hoben na Pos Chikito cu a socede e anochi di 15 di Januari 2021.
Manera ta corda, e anochi ey di 15 di Januari 2021, hende a yega y tira e hoben Lisander Leonardo Ignacio di 21 aña mientras e ta sinta den un auto staciona den un cura di cas. El a ser mata cu tiro den cabez.
Recherche di San Nicolas a traha masha duro riba e caso aki, y algun tempo pasa a detene 3 persona. Pero awor nan ta convenci cu tin un persona mas cu ta e 'mastermind'.
Pesey nan a detene un homber cu yama Brandon D. Wouters di 23 aña naci na Aruba. El a keda deteni na su cas den Caya St. Lucia na San Nicolas.
Vocero di Polis Lito Lacle a confirma, cu e detencion aki a pone cu e cantidad di hende aresta pa e caso di asesinato aki a bira 4. El a agrega cu e investigacion preliminar ta mustra cu e ta un problema entre gangnan.
Lacle a bisa, cu pa Cuerpo Policial por resolve mas caso cooperacion y informacion di pueblo di Aruba ta hopi importante, pesey nan ta pidi si bo tin cualkier informacion yama nan tipline na 111-41. Nan ta garantisa cu bo ta keda anonimo.
