Deposito grandi di articulonan di ladronicia descubri na Sero Lopez

ORANJESTAD (AAN): Habitantenan di area di Casibari y Sero Lopez pa varios luna caba ta notando hopi movimento raro den e bario.

Tanto di dia como anochi bo ta mira varios Adicto Ambulante ta cana na un forma paranoico cu tas colga na nan curpa, of hemchi den nan man.  Poco rato despues bo ta haya nan ta cana bek pero nada di tas, ni hemchi.

   Autoridadnan di e asina yama Team Woninginbraken di Cuerpo Policial, hunto cu oficialnan hudicial di Recherche di San Nicolas, a cruza brug bin te area di Paradera y Piedra Plat, pa tene un razzia riba Diasabra.

   Nan a yega di sorpresa na un tereno na Sero Lopez, unda nan a bin topa cu 2 container yena cu articulonan procedente di ladronicia.

   Vocero Policial Lito Lacle, a confirma cu tur esaki ta a base di un investigacion  andando, e Team Woninginbraken a tene e razzia aki riba un tereno na Sero Lopez.  Den e entrada hudicial aki a bin descubri dos container yena cu articulonan procedente di diferente ladronicia cometi ultimo luna- y simannan.

   Tambe a detene 2 homber di inicialnan R.T.W. di 32 aña naci na Aruba, y tambe O.D.C. di 29 aña naci na Aruba.

   Fuera di e mercancianan aki benta den e container, nan a confisca dos pickup cu probablemente ta procedente di ladronicia.

   Tur articulo a wordo saca di eynan pa asina Recherche ta bay check na kende cada uno ta pertenece.

  Pa Cuerpo Policial por resolve mas caso cooperacion y informacion di pueblo di Aruba ta hopi importante, pesey nos ta pidi si bo tin cualkier informacion yama nan tipline di Polis cu ta: 111-41. Nan ta garantisa cu bo ta keda anonimo.