ORANJESTAD (AAN): E cruzada di Arnold Schuttestraat y Lloyd G. Smith Boulevard, cu ta net e cruzada pariba di
e ‘Brug di Renaissance’, tin un borchi cu ta indica claramente cu chauffeurnan cu yega na e T-weg aki, por bira solamente bay na man drechi (direccion pabao).
Pero tur dia ta hopi auto bo ta mira ta “tira short-cut” y bira bay pariba, esta na man robez, siendo e ta prohibi.
Dialuna mainta, den djis un rato di tempo, un unidad di Polis di Playa a gara varios chauffeur ta violando e ley di trafico door di haci e birada ilegal aki.
DIARIO a compronde cu ta Fiscal mes di Ministerio Publico a duna ordo na Polis pa haci mas control na e cruzada aki, como cu tin claramente borchi poni cu bo no por haci un birada na man robez.
Riba e potret aki por mira momento cu Polis a gara chauffeur di un Ford Explorer color cora, y un Toyota Yaris blanco cu a dal e birada prohibi aki y subi Boulevard.
Cada un di e chauffeurnan a haya un proces verbaal.
