ORANJESTAD (AAN): Manera DIARIO a menciona caba den edicion di siman pasa, na Aruba e asina yama “Project Team Drugspanden”
ta un equipo di Cuerpo Policial Aruba cu a wordo lanta pa entre otro pa investiga bendemento di droga for di casnan, y tambe riba caya.
E grupo aki a bin pa asina stop cu tur e bendemento di droga den varios bario y skina.
Vocero Policial Lito Lacle, a splica cu relaciona cu un investigacion andando Project Team Drugspanden a tene Diasabra un razzia na un cas cu ta situa den Louis De Colignystraat. E caya aki ta como 45 meter panort di Aruba Carnival Village.
E razzia aki ta uno cu a sorprende e hendenan eynan. Mesora a detene tres homber cu a wordo haya na e cas. Ta trata di e homber C.R.C. di 29 añnaci na Aruba di 29 aña, e homber V.M.B. di 60 aña naci na Aruba. Tambe e homber cu a identifica su mes como ‘Sunshine’. E no kier a duna su nomber ni edad e momento ey. Pero pa Polis esey no ta problema, como cu via di vingerprint y demas interogacion lo bay haya sa su nomber toch despues.
Vocero di Polis a confirma, cu durante e entrada hudicial aki na Louis De Colignystraat a confisca un cantidad basta considerable di droga, entre otro cocaina, y tambe e droga conoci como ‘piedra’. Tambe a haya suma grandi di placa cash.
Tur material a wordo confisca, y e tres hombernan a wordo hiba pa asina nan pasa den interogacion rigoroso.
Pa Cuerpo Policial por resolve mas caso cooperacion y informacion di pueblo di Aruba ta hopi importante, pesey nan ta pidi si bo tin cualkier informacion yama e tipline di Polis cu ta: 111-41. Nan ta garantisa cu bo ta keda anonimo.
