Dama pega den auto compacto cu a bolter y cay den greppel

ORANJESTAD (AAN): Diferente yamada a drenta Diamars atardi poco despues di 2:00 pm na Central di Polis,

pa informa cu un Toyota Vitz a caba di perde control, hala banda zuid, bolter y pega den greppel riba caminda di Kibaima pa Pos Abao, na altura di Hato.  Esaki a pone cu mesora a despacha algun patruya pa check kico ta pasando.

   Riba e caminda aki, y na un distancia di algun cien meter pabao di Kazerne di Bombero na Tanki Flip, e prome patruya a bin topa cu un auto compacto Toyota Vitz color blanco cu number A-75866 cu a bolter y keda gekenter den e greppel riba su banda drechi.

   E vehiculo aki ta tipo Right-Hand Drive, pues esey nifica cu e unico ocupante, esta e dama chauffeur a keda pega na e parti mas abao di e auto y no por sali.  E tabata na tino, pero den dolor inmenso.  Ambulance tambe a yega, pero e forma con e auto a keda di banda den e greppel.

   A manda busca Vehiculo di Rescate di Cuerpo di Bombero, kendenan a yega den un rato eynan como cu e ta cerca di Kazerne.  Aki a dicidi cu nan ta bay corta parti di e porta banda robez, y mitar di e dak.  Di e forma ey porfin e chauffeur a wordo saca, y pasa pa Paramediconan cu a dicidi na bay cune mesora cu Ambulance pa Hospital.

   Personal di Forensys y tambe Polis di Trafico a yega pa documenta e accident.  E auto a keda total loss.