Acto robez di un chauffeur a ocasiona accident grandi cu un Truck  

Full su cargamento di grofvuil a basha abao

ORANJESTAD (AAN): Un hopi mal hecho ta loke chauffeur di un vehiculo 4x4 tipo ‘Hummer’ a haci Diasabra merdia algo pasa di 12:00 pm.  E chauffeur di e Hummer a sali for di un T-weg cu tin panort di Home Best Supermarket riba caminda di Sero Biento pa Santa Marta, y aunke el a mira cu tin un Truck ta moviendo, toch el a sali su dilanti poco-poco, y a hasta slow-down pa colmo mey-mey di caminda.

   No ta conoci si acaso ta un ‘brake check’ el a haci, of kico, pero el a stop completamente mey-mey di caminda net ora cu un Truck pisa yena cu grofvuil ta bini di panort.

   E truck aki ta pisa, y e chauffeur no por kere su wowo con un Hummer H2 a sali su dilanti y pa colmo a slow-down mey-mey di caminda.  Na ultimo momento e chauffeur di Truck DT-242 a dicidi pa evita di ocasiona un accident horibel di plama den e Hummer H2, el a opta pa dal un birada skerpi na su man drechi pa purba drenta e T-weg como unico recurso.  Sinembargo e peso di su truck y e movimento, a pone cu esaki a bolter, y plama tur e grofvuil abao rond di e Supermarket.

   Barancanan grandi a lora bay den tur direccion, y hasta a dal den un vehiculo SUV cu ta staciona panort di e Supermarket.

   Milagrosamente ningun hende a resulta herida.  E chauffeur di e Hummer H2 mes e ora a core primi trot y a bandona e desastre cu el a caba di ocasiona atras.

   Polis a yega rapido y nan a bay check e Security Video Camera di e Supermarket, y aki enberdad a mira con anti-social e chauffeur di e Hummer H2 tabata pa ocasiona un accident cu por tabatin consecuencia hopi grave mes.  A manda busca Takelwagen extra grandi pa asina bolter e truck bek, y cuminza cu limpieza di tur bloki, santo, palo, y demas grofvuil cu a plama rond.  Polis awor ta buscando e Hummer H2 aki pa asina e chauffeur duna cuenta di su stunt robez.