Accident den De La Sallestraat cu resultado fatal
- Peaton di edad grandi di 85 aña herida mortalmente
- E di dos accident di peaton den mesun siman
ORANJESTAD (AAN): Manera cu DIARIO a trece dilanti caba den edicion di Diabierna, ta asina cu riba Diahuebs atardi pa 6:15 pm, den e momento di 'rush hour' riba De La Sallestraat, a registra un accident net na e cruzada cu Indianenweg, net dilanti di Watergate.
Un peaton di edad grandi a bay cruza e caya aki, net ora cu un sedan Kia Rio color blanco cu number A-67679 tabata bayendo direccion pabao.
E auto a dal e persona masculino cu tabata cruzando caya cu su garoti, y debi na impacto el a pasa riba e hood y bay dal cu cabez den windshield, pa despues bons y bay cay abao. E persona mesora a cuminza grita di dolor eybao benta, y sanger a cuminza sali di herida.
E prome unidad di polis ta bin topa cu un homber di edad avansa ariba caminda na unda su situacion tabata mustra grave.
Algun hende eybanda a dicidi na yuda cu un cusinchi pa suavisa e curpa di e asfalt cayente eybao. E cusinchi a mancha casi completamente cu sanger.
Polisnan mesora a cera e caya eybanda pa asina duna espacio pa Paramediconan haci e trabao. Nan a haya e peaton benta di banda abao riba caminda, sclamando di dolor, y ta mustra di ta basta critico. Asina mes di banda, nan a pone riba brancard, pa poco-poco pone drumi cara na halto, y asina mara su curpa y su cabez bon cu brace, y asina bay cune cu maximo urgencia pa Servicio di Emergencia na Hospital.
Specialista di trafico ta presenta na e sitio pa haci na investigacion. Departamento di Bureau Slachtofferhulp a wordo poni na altura asina por asisti e famia na nan yegada na Hospital.
Como cuatro ora despues, esta pa 10:22 pm, Docter na Hospital a constata morto di Eliseo Berrospi Upayacu, naci dia 14 di Juni 1939 na Peru, pues tin 85 aña di edad.
Vocero policial Liliana Rasmijn a confirma cu esaki a bira e di dos morto den trafico pa aña 2025.
Cuerpo Policial y DIARIO ta manda palabra di condolencia na famia di e fayecido.
