Dama den Toyota Yaris a bay dal riba Truck cu tanki grandi di Arugas

Accident serio na Hato

ORANJESTAD (AAN): Unidadnan di Polis como tambe vehiculo di rescate di Cuerpo di Bombero a wordo manda Dialuna mainta trempan pa caminda di Tanki Flip pa Pos Abao, debi cu un truck cu tanki grandi di Arugas a haye envolvi den un accident di trafico.

   Ta asina cu e Ford F-650 truck cu number TR-63 coriendo e momento ey di Hato bayendo direccion di Pos Abao, a haye confronta cu un auto sedan Toyota Yaris cu number A-62689 color shinishi bayendo pariba.  Na stuur tabata tin un dama, kende segun declaracion di personanan eybanda, lo a pega soño na stuur.

   Esey a pone cu su auto a cuminza hala mas na man robez y drenta den e via contrario, net ora cu e Truck grandi ta yegando.

   Chauffeur di truck a trata na maniobra halando na banda robez pa evita lo peor, pero asina mes e Toyota Yaris a sigui y sin primi brake a dal na bumper, wiel, wantalodo, y step di banda drechi di e Ford Truck, pa despues bay cay parcialmente den e greppel banda panort di caminda.  E parti dilanti di e Yaris a keda completamente destrui den e impacto aki, mientras e truck a haya minimo daño.

   Polis cu a yega a solicita pa Ambulance tambe yega cu urgencia, y a pidi pa Brandweer bin cu Vehiculo di Rescate, pa por saca e dama cu tabata tin dolor.  E porta banda di e chauffeur no kier a habri, y a warda riba e profesionalnan di Bombero pa habri esaki.

   Segun extra informacion, e dama a caba di traha un warda di anochi y lo tabata basta cansa y cansancio posiblemente a pone cu e la bay soño tras di stuur.  Polis ta check e teoria tambe cu kizas el a bira malo, y pesey su pia a primi trot y no por a controla mas.  Tambe tin e teoria cu kizas solo fuerte di e mainta trempan ey a ‘blind’ e temporalmente cu e no por mira e caminda bon.

   Despues cu e la wordo saca di e auto, Paramediconan a stabiliza e chauffeur, y despues a sali cu urgencia cu ne pa Servicio di Emergencia na Dr. Horacio Oduber Hospitaal.