Accident pisa na Saliña Cerca a laga tres hoben herida

Velocidad halto a laga SUV completamente destrui

ORANJESTAD (AAN): Diadomingo anochi den careda di 11:00 pm, Central di Polis a core dirigi patruya di Polis di Noord rumbo pa area di Saliña Cerca pa un auto cu a bolter.

   Ora cu Polis a yega na e lugar cu ta Saliña Cerca 26, a bin nota cu no ta trata aki di un auto, sino un vehiculo tipo SUV Toyota Rav4 cu number A-12704, y casi no por a kere nan wowo.  Pasobra di e Rav4 aki color preto, casi nada a resta di dje.

   Aki mesora a pidi pa Vehiculo di Rescate di Cuerpo di Bombero, y tambe diferente unidad di Ambulance, debi cu den e vehiculo tabata tin 3 hoben.

   Testigonan a splica cu e vehiculo aki tabata bayendo zuid cu un velocidad super halto. Poco mas pazuid di Wacamaya Appartements, chauffeur a perde control riba su stuur, y e vehiculo a bay na su man robes.  Den e scual aki, e vehiculo a bay halto y bay termina contra un vehiculo tipo Van di e compania DG General Maintenance cu tabata staciona pafo di e oficina.  E Toyota tabata gekenter, y casi tur e dak y body a dobla.

   Debi na e impacto aki, e Toyota Rav4 a keda completamente destrui, tur hende ta bisa cu ta un milager cu e hobennan a scapa di morto.

   E hobennan tabata herida, pero tabata papia y por a comunica tanto cu bomberonan, polis y Paramediconan.  Varios ambulance a presenta pa transporta nan pa Hospitaal.

   Na e lugar, mayornan di e hobennan a presenta pa pone nan mes na altura di locual a sosode.  Polis ta investigando e accident fuerte aki.