Dropping na costa di Aruba
ORANJESTAD (AAN): Poco prome cu salida di solo, esta riba Diamars 7 di April alrededor di 6:00 am, Central di Polis ta wordo notifica cu pariba di Anker na Colony, a topa cu un boto y a mira cu tambe tin bultonan di droga na e costa.
Mesora a despacha unidadnan di San Nicolas hunto cu e departamento di Crimen Organisa (UGC) pa e area menciona.
Na e yegada di Polis, e agentenan a bin topa cu un boto cu tin un outboard engine na dje.
Controlando den e area, a bin localisa varios bulto di droga, y tambe varios purun cu substancia ilicito. Tambe a haya varios pakete los plama na e lugar, y tur a wordo recogi.
E boto como tambe droganan y articulonan a keda confisca pa e departamento concerni y e caso ta den pleno investigacion. No ta descarta cu lo tin detencion relaciona cu e caso aki. Ningun hende a wordo deteni, pasobra a haya ningun persona eybanda.
Cuerpo Policial Aruba ta haci un suplica na comunidad si bo tin cualkier informacion yama e Tipline di Polis na 111-41. Bo anonimidad ta keda garantisa.
