Chauffeur cu a causa hit-and-run termina den hospital

ORANJESTAD (AAN): – Diasabra anochi, poco despues di 11’or y mey,

a sosode un accidente di trafico na altura di Wendy’s na Cura Cabay, na unda un Hyundai Accent a dal un Renault y despues a bay for di e sitio.

Segun informacion disponibel, polis a yega na e sitio y a topa cu e Renault, den cual tabata un dama hunto cu su yiu. E Hyundai Accent cu a envolvi den e accidente ya no tabata presente.

Riba e lugar di e accidente tabatin diferente parti di e Hyundai Accent, cu a keda riba caminda despues di e impacto. Un rato despues, e chauffeur di e Hyundai Accent a bolbe na e sitio pa piki algun parti di su auto.

Polis a atende cu e homber, kende no kier a divulga na unda su auto ta. Mientras cu e mes tabata herida y aparentemente tabatin un kap bastante serio na su cabes.

Otro patruya a sali pa controla e area y poco despues a topa cu e Hyundai Accent para un poco mas leu na Brazil.

Debi na e seriedad di e herida cu e homber tabata tin, polis a pidi presencia di un ambulance. Paramediconan a duna e homber atencion y despues a hib'e Hospital pa tratamento.

Personal di polis di trafico tambe a yega na e lugar pa atende e caso y haci e investigacion necesario.