Chauffeur burachi a dal dos dama canando anochi pa nan salud

ORANJSTAD (AAN): Diaranson anochi pa mas o menos 7:45 pm, Central di Polis a ricibi notificacion urgente cu

riba caminda di Solito pa Tanki Leendert, un auto a caba di dal dos persona, y ambos ta benta abao riba caminda.

   Mesora unidadnan di Polis di Playa a mobiliza pa e caminda di Kamerlingh Onnestraat bay nort, y yegando na Solito, a bin nota cu e accident no ta riba e caminda principal, sino e caminda paralelo banda pariba.

   Nan a bin topa cu dos dama abao, uno parcialmente riba acera, y e otro mas cerca di caminda.  Nan a splica cu nan ta djis cana y jog pa nan salud.  E accident a socede net dilanti e edificio Dental Wellness na Solito 112.

   Polis a nota cu e auto cu a dal nan, esta un Nissan Skyline color shinishi cu number A-49211 a keda para eynan y no a sigui move bay.

   E chauffeur di e Nissan Skyline a bisa Polis, cu e no a mira e dos señoranan ta cana, y el a dal ambos lagando nan herida.  E victimanan tabatin dolor na pecho y tambe na cabez.  Centro di Alarma na su turno a manda dos unidad di Ambulance.  A cera ambos banda di caminda, y Polis di Trafico tambe a yega.

  Mientras tanto cu Polis ta papia cu e chauffeur, nan a bin nota cu e tin caracteristica di ta un hende bao influencia.  Nan a pidi su cooperacion pa haci test di supla, y el a bay di acuerdo.  E test cu e aparato di Alco Sensor a bay malo p’e, pues e mashin a detecta cu e ta bao influencia.  Mesora nan a pone boei na su mannan, y a manda busca Vehiculo di Transporte di CEA pa bay cu ne.  Nan a hibe pa Warda di Polis, unda el a ser presenta dilanti Fiscal Auxiliar.

   Di e victimanan, a nota cu ambos señora tabata na tino y a comunica cu tanto Polis y e Paramediconan.

Ambos a wordo hiba pa Servicio di Emergencia na Hospital pa haci un check up mas avansa.