Ya desde 2 Juni 2025
ORANJESTAD (AAN): Procurador General di Aruba, mr. Flanegien ta hibando un maneho transparente y estricto pa cu e forma con agentenan di Polis mester actua, especialmente ora ta trata di haci uso di violencia. Ora cu tin cuestionamento riba e forma con un of mas agente di Polis a actua, un investigacion mester tuma lugar.
Procurador General (PG) mr. Flanegien a introduci un procedura completo, con tur esaki mester sosode pa asina evita cualkier pensamento di imparcialidad. E instruccionnan aki ta conta pa Cuerpo Policial di Aruba, Landsrecherche, Guarda Costa y Recherche Samenwerkings Team (RST)
Mantene orden legal: Polis tin e trabao pa percura (subdito na autoridad competente y conforme cu ley) pa mantene orden legal y yuda esnan cu mester ayudo. Esey ta e motibo cu Polis tin e monopolio di uso di violencia legitimo.
Polis ta autoriza pa uso di violencia den manera adecua y den cierto caso, ta spera esey tambe di Polis. Un ciudadano por kita di un situacion peligroso, pero ta spera di Polis cu Polis ta actua activo pa pone fin na e situacion. Esey kiermen cu Polis ta den un posicion vulnerable. Mester tin e transparencia tocante e forma con Polis ta ehecuta e monopolio di uso di violencia legitimo ta importante pa e confianza di comunidad den e manera di actua di Gobierno.
Uzo di violencia segun ley: Kico ley ta bisa tocante uso di violencia di parti di Polis. Ley ta bisa cu Polis, inclusivo agente di Polis extraordinario, agente di Polis den preparacion, ta autoriza den e ehercisio legitimo di su cargo of responsabilidad, pa usa violencia contra hende of cos ora e meta intenciona ta hustifica esaki (segun ley e ta yama proporcionalidad) y e meta no por worde logra na un otro manera (subsidiaridad), considerando e peligernan manera na e uso di violencia.
Tambe ta asina cu e uso di e autoridad legitimo aki, relaciona cu e meta intencional, mester ta razonabel y modera.
E cuadro general dentro di cual Polis por haci uso di violencia, ta consisti di normanan di instruccion cu ta poni den e “Landsbesluit” di ehercicio di cargo y uso legitimo di violencia (ambts- en geweldsinstructie).
Segun e nota di informacion cu ta bay hunto cu e “Landsbesluit” aki, tin ancra den e “Landsbesluit” tanto e reglanan general tocante e otorgacion di autoridad riba su mes, como tambe relaciona cu e condicionnan bao di cual e violencia mester worde aplica, pa asina Polis eherce e monopolio di uso di violencia legitimo corectamente.
Pasobra e medionan aki ta pa e ciudadano, contra kende nan worde usa, hopi impactante y ta viola e ciudadano su derechonan fundamental.
Den tur caso caminda uso di violencia a hiba na consecuencianan serio, mester bin investigacion efectivo, independiente y cu e determinacion di e sucedido. Landsrecherche ta haci e investigacion aki bou autoridad di Ministerio Publico.
Incidentenan di uso di violencia: E instruccion aki ta aplicabel den e casonan caminda Polis a usa violencia y a cay morto of un hende a sufri heridanan hopi grave. Of caminda a haci uso di un arma di candela y un hende a resulta herida.
Of caminda a haci uso di violencia y esaki a yega na conocimento di Ministerio Publico y Fiscal a dicidi pa investiga.
Investigacion: Den interes di transparencia, independencia y duda den imparcialidad, como tambe pa garantiza e derechonan fundamental di cada ciudadano, Fiscal di Ministerio Publico ta pasa e investigacion contra e sospechoso(nan) Polis, mesora pa Landsrecherche.
Landsrecherche ta e unico Instancia autoriza pa hiba e investigacion. E miembronan di Landsrecherche ta haya e orden pa investiga, directamente di PG por escrito.
Imparcialidad den investigacion: E investigacion riba e motibo di uso di violencia, ta bao autoridad di un Fiscal. E Fiscal Mayor ta percura pa un investigacion imparcial o sea ta apunta un Fiscal cu ta totalmente independiente di e Instancia policial unda e sospechoso Polis ta traha y ta evita tur aparencia di dependencia.
Si Fiscal Mayor no por haya un Fiscal local cu ta cumpli cu e criteria, e PG lo por pidi cooperacion di PG di e paisnan ruman. E Fiscal Mayor y e PG ta worde teni na altura di e caso y e decisionnan cu ta worde tuma. Conforme ley, e Fiscal Mayor ta tuma e decision final y ta informa e PG di esaki. E PG tin e autoridad pa revoca e decision cu e Fiscal Mayor a tuma.
Investiga ora polis uza arma: Ora un Polis a usa un arma di candela, e ta su obligacion di notifica esaki, conforme e procedura stipula den (geweldsinstructie). E Fiscal por duna orden pa haci un investigacion riba hechonan pa mira si e uso di violencia, ta cuadra cu loke ta para den e “Landsverordening Politie” y “Landsverordening Ambts en Geweldsinstructie Politie”.
Den e investigacion di hechonan, e agente di Polis no ta ni sospechoso, ni testigo. E mester worde scucha dentro di 24 ora despues di e incidente. Si en caso e Fiscal mes ora, a base di e investigacion, tin duda si e agente di Polis a actua de acuerdo cu e instruccion di violencia y un apelacion riba exclui castigo no ta parce evidente, e Fiscal e ora ey por cuminsa cu un investigacion penal caminda e agente di Polis ta worde marca como un sospechoso y lo worde scucha dentro di 24 ora como un sospechoso.
Si e agente di Polis ta worde marca como un sospechoso, no necesariamente esey kiermen cu e ta worde deteni pa e investigacion. E motivacion pa no aplica detencion tin di haci cu e hecho cu un agente di Polis tin e monopolio di uso legitimo di violencia. Mester evita cu agentenan policial, cu a base di reglanan vigente por usa violencia cu e arma di servicio suministra pa autoridad, ta duda pa miedo di worde deteni.
Esey lo hiba pa situacionnan di peliger inacceptabel tanto pa e ciudadano como pa e agente di Polis y su partner.
Persecusion di polis: E Fiscal di Ministerio Publico ta pone su proposicion tocante con pa sigui cu e caso, na e Fiscal Mayor, kende ta determina si e uso di violencia tabata legitimo.
E Fiscal Mayor ta dicidi tocante persecusion di e agente di Polis. E PG ta autoriza pa kita di e decision aki, pero e mester bin cu argumentonan pa mustra esaki.
Informa victima y famia: Uzo di violencia door di Polis tin impacto grandi riba victimanan y famia di e fayecido y henter comunidad. Fiscal ta informa e victima y famia di e decision si ta persigui e Polis of no y cual califiacion Fiscal a scoge.
Ministerio Publico ta informa publico tocante e investigacion.
