Chauffeur bao influencia a causa accidente serio cu varios herido

ORANJESTAD (AAN):  Diasabra anochi, pa casi 12'or di marduga, na rotonde di Tanki Leendert a tuma lugar un accidente serio cu varios herido.

Central di Polis mesora a manda unidadnan di Polis y Ambulance na e lugar. Mirando e situacion, a dicidi di pidi asistencia di Brandweer, pa saca un di e heridonan for di e auto.

Segun informacionnan, un auto marca Nissan Fairlady Z, tabata bin cu velocidad halto for di pabao y a dal un Yaris shinishi, cu ya tabata riba e rotonde.  Aparentemente, tanto e chauffeur y pasahero di e Nissan tabata bao di influencia.

Testigonan a conta cu e chauffeur di e Nissan a baha for di e auto y tabata basta rabia.

Polis a cera e area pa asina e unidadnan di Brandweer por a pusha e Nissan atras y corta e porta di e Yaris, pa saca un señora for di e auto, kende a wordo transporta pa Hospital.

E chauffeur di e Nissan a purba di huy y a drenta Cas Casuela, pero agentenan di polis a logra deten'e di biaha.