Polis a haci control pa mira comportacion di comunidad den trafico

Control den trafico ta esencial pa garantisa siguridad

ORANJESTAD (AAN): Diabierna atardi, diferente unidad di cuerpo policial a bin hunto pa asina forma parti di un control grandi den trafico. Minister di Husticia mr. drs. Arthur Dowers tambe presente na sitio, pa asina cu su presencia, duna un indicacion kico por spera bek como maneho di awo en adelante. Presencia policial den trafico ta esencial pa un trafico mas sigur.

            Polis a haci control pa mira e comportacion di e comunidad den trafico. Den apenas algun ora, un cantidad di aproximadamente shen vehiculo a keda para y controla. Esaki a tuma luga den area di Linear Park, L.G. Smith Boulevard.

            A confisca algun vehiculo, como tambe droga pero locual a constata ademas di tur esey, ta cu hopi automobilista cu no tin e documentacion necesario pa por maneha un vehiculo riba caretera.

            Pa ministerio di husticia, di control den trafico ta necesario pa yuda aumenta e siguridad den trafico. Na momento cu confisca vehiculonan cu no ta cumpli cu tur rekisito, bo ta saca esakinan for di circulacion den trafico. Na mas di un ocasion por a scucha for di e comunidad cu si tin tur papel na ordo, y ta haya nan mes envolvi den accidente causa pa vehiculonan sin seguro, y ta keda cu gasto enorme pa drecha nan auto.

            Miniser Dowers ta enfatisa tambe riba e parti preventivo, cual durante su gobernacion anterior tabata e exito indiscutibel, cu a logra baha e porcentahe di accidente rond nos isla na cifranan hopi abao.

            Esaki ta danki na campañanan di prevencion y conscientisacion continuo dirigi riba esnan cu ta forma parti di nos trafico. E control di trafico ta primordialmente riba documentonan di e vehiculo, comportacion den trafico, condicion di e auto, etc, y si tin sospecho di cosnan ilicito, ta activa e cacho di K9 unit pa haci su inspeccion.

            E presencia policial ta un factor importante y preventivo den e comportacion den trafico. Na momento cu bo mira cu tin polis na diferente area strategico, e ta influencia e automobilista pa tene su mes na regla di trafico, manera entre otro bisti safety belt, no papia na celular etc, pero tambe evita cu ta maneha bao influencia di alcohol.

            Por spera mas control grandi rond isla, como tambe mas presencia di polis pa asina gana e teritorio bek cu a bay perdi den e ultimo añanan, reenforsa e siguridad y trece orden publico.