Chauffeur a keda pega den accident pisa na Kibaima

Diamars mainta

ORANJESTAD (AAN): Tabata Diamars mainta basta trempan, cu Central di Polis a ricibi notificacion cu riba e caminda di Santa Cruz pa Balashi, na altura di Kibaima tin un accident fuerte cu a caba di socede.  Tabata mustra cu esnan herida ta grave, y pesey ta pidi presencia di autoridad.

   Polis na su turno mesora a manda patruya di Santa Cruz pa e lugar, y a dirigi tambe Vehiculo di Rescate di Cuerpo di Bombero, y tambe Ambulance.

   E prome patruya cu a yega, a bin topa cu un accident pisa entre dos auto sedan, esta un Toyota Yaris color cora y un Suzuki Swift color blauw.  Na e autonan a mira cu ta trata di un accident frontal.

   E chauffeur di e Toyota Yaris tabata pega den e auto, y ora cu Vehiculo di Rescate a yega, nan a cuminza traha pa busca forma pa habri espacio pa e sali.  Pero e Yaris tabata basta hopi kibra y tabata dificil pa saca su curpa.  Bomberonan a traha basta rato pa por a saca e chauffeur.

   Polisnan a cera e pida caminda aki, for di cruzada di Mondi Fierno y tambe rotonde di Balashi, pa duna espacio pa personal di rescate por traha.  E Yaris a keda mey-mey di caminda, y e Swift benta na banda riba acera.

   Polis di Trafico a solicita presencia di team forensico di BFTO tambe pa yuda documenta e accident.  Ora cu Bomberonan a logra libera e chauffeur masculino, el a wordo pasa pa Paramediconan cu a stabiliza su situacion y despues sali cu ne pa Hospital.  E investigacion di e desgracia fuerte aki cu hopi daño material awor ta den man di Polis.