Unidad motoriza di Polis a detene 6 chauffeur

ORANJESTAD (AAN): Riba Diadomingo 1 di Februari 2026, e unidadnan motoriza di Polis na Aruba, a tene un control basta extenso,

y esaki a socede prome, durante, y despues di Parada di Mucha na Oranjestad.

   E unidadnan aki a bay staciona na diferente punto strategico den Oranjestad.  Asina a controla riba tur aspecto di cumplimento cu ley di trafico.

   Vocero Liliana Rasmijn di Cuerpo Policial, a confirma cu durante e control a detene un total di 6 chauffeur.

   Ta trata di 5 detencion pa maneha bao influencia di alcohol y 1 detencion  pa posesion di droga.  Relativamente e cantidad di detencion aki ta menos compara cu aña anterior.  Por corda cu na 2025, durante e dia di control tabatin 7 detencion.

   Cuerpo Policial ta enfatiza cu e controlnan lo sigui. Ta keda recorda pa percura pa bo documentonan ta na ordo y si bo ta  bebe no stuur. Busca Bo Amigo Responsabel.  Un trafico sigur ta responsabilidad di nos tur.