Caso cruel caminda a venena tres cacho hopi stima den bario di Paradera

Uno a ser haya cu pia mara pusha bao un container

• Keto bay ta buscando dos cacho cu no a haya nan ainda 

ORANJESTAD (AAN): Den fin di siman e informacion hopi tristo a keda circula, indicando cu tin e sospecho cu un of mas hende anti-social lo a venena un total di 3 cacho hopi manso den distrito di Paradera.  Un situacion cu ya caba a explota di hendenan disgusta cu loke a socede.

   Tur cos a cuminza ora cu siman pasa, Diaranson 14 di Januari, ora diripiente hopi hende a ripara cu tres cacho cu ta hopi stima pa varios bisiña no ta wordo mira mas.  Esaki ta den area di rotonde di Paradera.  E cacho blanco yama Bobby, e cacho bruin yama Bruno, y esun mas chikito, un tefi yama Leila.

   E tres cachonan aki ningun hende sa kende ta nan doño original.  E cachonan mes a cana yega te den e area aki, y e trio di animal aki mes a dicidi na ‘tira anker’ na un cas eybanda, unda e habitante femenino tin hopi cariño pa animalnan.  E dama a cuminza duna nan cuminda y awa limpi tur dia.  E cachonan no ta di dje, pero el a cuminza cuida nan.  A hasta pone banchi rond di nan nek.

   Sinembargo, siman pasa diripiente tur tres a desaparece.  Famia y bisiñanan a ripara esey mesora.  A cuminza grita y yama nan nomber, pero e cachonan aki no tabata bin bek.

   Riba Social Media a cuminza comparti nan potret y pidiendo comunidad pa check si nan por a mira nan.  E tres cachonan aki semper ta cana hunto, pero e biaha aki no por a localiza nan.  Famianan tabata hasta core rond den henter area di Paradera, Sero Patrishi, Shiribana, Roncado, Piedra Plat, y Rooi Afo.  Pero nada.

   A hasta yama Serlimar pa check si por a haya peticion pa kadaverophaler lo por a haya peticion pa busca cacho morto den area di Paradera.  A base di esaki a bay na un bouwkeet riba caminda di Paradera pa Nuñe, y na un Container cu ta ser uza pa bouwkeet, a bin haya Bobby morto.  Su pia tabata mara cu un cabuya, y e curpa di e cacho tabata manera pusha bao di e bom di e container.

   Ora cu personal di Serlimar a yega, no por a saca e cacho di eybao.  Famianan a yega, y nan mes a dicidi na busca y paga pa un Takelwagen yega y yuda hisa e Container pa asina saca e animal di eybao.  E cacho a wordo haya eynan morto, y cu caracteristica cu el a wordo venena.

   Famianan no a laga Serlimar bay cu e cacho, pasobra nan mes a hib’e na un compania local cu ta un crematorio pa mascota, y nan a crema nan animal stima.

   Mientras tanto, ainda nada mas di e otro dos cachonan, esta Bruno y Leila.  Algun hende a raporta cu nan a mira siman pasa un cacho morto den area patras di un negoshi, pero no tin mas detaye.

   E señorita cu tabata cuida e tres animalnan aki (aunke nan no ta di dje originalmente), tin su curason keto bay kibra.  E ta haci peticion pa comunidad yuda cu informacion cu por pone nan logra yega na nan ser keri.

   DIARIO a compronde cu Polis tambe a wordo yama y nan a bay na e Container unda nan a haya e cacho morto, cu su pia mara na cabuya, y nan a traha un rapport di e caso aki.

   Si acaso abo por a mira e cachonan aki siman pasa, y tin detaye, por yama anonimo na Tipline di Polis na 111-41, of bo por yama e famia na WhatsApp 561-6266.

   Diferente hende sa mira e tres cachonan aki den area di Paradera y como cu nan ta asina lief, hopi tabata duna nan cuminda.  Y awor nan tur ta den tristeza sabiendo cu nan a desaparece, y e chens ta grandi cu tur tres a wordo venena.