ORANJESTAD (AAN): Diadomingo atardi pa 5:05 pm, ora cu unidadnan di Polis Motoriza ta coriendo riba caminda di Tanki Leendert,
un poco pariba di Kapel Huan Pablo II, nan a duna señal na e manehador di un Scooter color oranje di marca Linhai pa e para. Nan a nota cu e Scooter aki tin un plachi di number cu nan mes a traha.
Ora cu Polis a pidi e manehador pa mira su rijbewijs, el a bisa cu e no tin esey. Ora cu a sigui papia cu e manehador, e agente a ripara cu e aliento di e manehador ta hole sterki na alcohol.
Polis a dicidi na laga e manehador haci test di supla riba Aparato di Alco Sensor IV, y esaki a sali malo pa e manehador. Mesora pa 5:10 pm, nan a detene e manehador pasobra el a viola Articulo 5 inciso 2, y tambe Articulo 10 y Articulo 21 di Ley di Trafico. Den su poder e tabatin un rugtas color shinishi/preto, y cu su permiso, nan a controla esaki.
Den e rugtas a bin haya un Lunchbox color roos. Ora cu a habri esaki, a bin topa cu marihuana den dje. Tambe a haya un balans chikito color preto. Tambe a haya mas marihuana den sakitonan chikito di plastico transparente.
A bin haya tambe placa cash.
E ora tur e placa, cu e balans, y e marihuana a wordo pasa pa Unidad di Crimen Organiza pa mas investigacion. Na Warda di Polis, Fiscal Auxiliar a ordena su detencion, pa asina e saca su wayaba, y despues por wordo interoga relaciona cu e droganan haya den su poder.
