Boto sospechoso a yega tera na Rancho di Nel na Barcadera

Diamars anochi...

ORANJESTAD (AAN): Diamars anochi, Central di Polis a dirigi diferente patruya policial disponibel direccion di Barcadera, pa bay check un supuesto boto sospechoso cu a caba di drenta.  Specificamente Central di Polis a manda nan pa ‘Rancho di Nel’.

   Aparentemente via di e Marine Radar di vigilancia, a detecta un ‘punto di contacto’ moviendo riba lama y cu tabata dirigi eynan.  Pues ta un boto cu tabata bin di zuid.

   Como cu e lo a yega tera, a pidi pa Polisnan bay tira un bista como cu nan por yega mas rapido.

   Parce cu e situacion actual a cambia desde cu a habri frontera bek cu Venezuela, lo tin un “bay-bin” di botonan.

   Autoridadnan a pidi pa un unidad di K9 tambe yega, pa asina haci extra control cu e animal riba e personanan y un pickup cu tin eynan.  Tur cos ta mustra cu e cacho a haci control, pero no a detecta nada ilegal.

   Algun observador a indica cu ta straño e hecho, cu Aduana ta eynan mes, y no a pidi asistencia di nan pa kizas Douane Recherche bin haci e controlnan debido. Pa combati crimen organiza mester team work y observadornan no ta mirando esey ta socede den forma harmonioso riba e isla.